是日花生，是藝人袁偉豪在戲院睇戲，前面有人食薯片，佢叫人細聲啲，人哋就上網開POST寸爆佢。
誰是誰非？不在現場難以判斷。但有一點很值得留意，就係當場鬧袁偉豪那個人的道理，是這樣的：
「咁x巴閉包場睇戲呀嗎！未聽過人講話睇戲不准進食！什麼大明星！咁X巴閉，點解要攞免費飛睇呀？」
覺得呢個道理係咪好熟呢？很多人做出一些缺德的仆街行為，你指責佢哋，佢哋就會用呢個萬用句式：
「咁巴閉你XYZ啦！唔好QRS嘛。咁叻你使乜ABC啫。」
例如，當有一些仆街在巴士開大喇叭聽歌打機，你叫佢細聲啲，佢就同你講(親身經歷)：
「咁巴閉你搭的士啦！唔好坐巴士嘛。咁叻你使乜坐巴士啫。」
我又聽過，有些人打尖，畀人話，佢又好理直氣壯咁話：
「我邊有打尖呀，痴線！咁巴閉你搭的士啦！唔好坐巴士嘛。咁叻你使乜坐巴士啫。」
呢種論調喺香港係非常流行的，而且明顯是強詞奪理，這些論調背後假設了：
-
我做的事騷擾到人冇犯法就冇問題。
-
你唔想畀人騷擾，你自己包車包場。
-
你做唔到包車包場，你同我地位一樣，你就冇資格指責我。
-
所以錯嘅係你。
睇戲當然可以食嘢，搭巴士當然可以用手機，但任何事的前提是：你不應騷擾到其他人。如果薯片袋或食薯片發出聲浪；如果你的手機發出聲浪；如果你打尖影響秩序，你就騷擾了其他人，損害了其他使用者的利益，這與他們能否包車包場無關，正因大家都是使用者，地位是平等的，才不應互相騷擾。反轉來講，如果你想享有那些食薯片、開大喇叭聽音樂打機和一定上到車兼有靚位坐的「特權」，你才應該去搭的士、自己開車和包場。
所以，我也是這樣窒返呢啲人嘅——「你咁巴閉想大大聲聽歌自己揸車或者搵司機車你嘛，使乜搭巴士啫。」
近年好流行一種評論風格：大大聲罵人仆街來掩飾自己(可能不自覺)的仆街行為。例如近日有「攞紙袋風波」，屁大的小事竟可演化成風波，事緣當事人其實也是用類似的邏輯開火——好巴閉呀？我買唔起呀？好難食呀你啲嘢我拎去餵狗……類似邏輯近年真係無處不在，所以香港今日極速威權化的結果，是一種因果——你不覺得以上論調經常出自達官貴人身上嗎？
-
我係利益衝突/我係僭建/我係違憲違法/我係賤人/我係出賣你哋香港利益。
-
你唔想畀我出賣/你睇唔順眼/你唔想畀我做官？你咁巴閉，你移民囉。
-
你移唔到民，你就冇資格指責我。
-
所以錯嘅係你哋班冇用又多多聲嘅賤民。
其實，在日常生活，很多人也不自覺套用了這樣的論調，這些人甚至還曾經因為達官貴人這樣說過而憤怒。
所以，才說這是因果呢！
題外話：薯片人說「未聽過人講話睇戲不准進食」。其實我真係好想有呢條禁令，因為有啲人真係唔識咩叫自律，也不會考慮他人感受。你試吓攞個榴槤入去食，你夠唔夠膽咁大聲講「未聽過人講話睇戲不准進食」？當然，戲院為了小賣部的利益，不會禁。如果這裏生活的人是大和民族，就不用諸多禁制，大家都不想為人添麻煩或騷擾到人而自律，但可惜，這裏是香港。
